هذه الحالات نقلتها بألفاظ المرضى وبنفس التعبيرات التي صدرت منهم ولم اتدخل فيها بالحذف أو الأضافة.

 

حالة (111) شاب – 25 سنة

وساوس السب، خايف أكون بقول حاجات وحشة على الناس، خايف أكون قلت جارتي بنت كذا وكذا (شتيمة)، كتبت الكتاب حاسس أني قلت كلمة الطلاق أحس أنها جوايا.

حالة (112) شاب – 26 سنة

وسواس استحضار النية، وسواس إن مفيش ربنا، يطلع مني كلام مش عاوز أقوله.

حالة (113) شاب – 30 سنة

عندي فكرة مسيطرة على مخي إن مخي مسيطر على قلبي.

حالة (114) – شاب – 21 سنة

أفكار تشكيك في الدين، تساؤلات عن معرفة أصحاب الديانات الأخرى عن دين الإسلام، طب لو معرفوش حسابهم إيه؟

هل هناك توبة مع إني عارف لكن هل فعلاً هناك توبة أظن إن مفيش توبة.

فكرة تقوللي انتحر وريح الناس منك. واللي عندي دة غضب من ربنا.

حالة (115) شاب – 21 سنة

أشك في تشكيل الآيات..

دايمًا أحس إن صرصار هيقع عليا.. دايمًا عندي فكرة إني بتعامل مع الصبيان كويس علشان عاوز أعمل معاهم الفاحشة.

حالة (116) شاب – 35 سنة

خايف لو معملتش العادة السرية يجيلي دوالي.. أعمل جدول لعمل العادة السريةكل شهر.

آجي أمارس مع زوجتي خايف أفشل مع أني بعمل معاها كويس ودايمًا أسألها عملتي مع حد قبل كده مع أني عارف أنها طاهرة وشريفة.

حالة (117) شاب – 26 سنة

عندي فكرة معذباني كأني بقول إن الشمس هى ربنا وإن القمر هو ربنا وإن كشاف النور هو ربنا..

أى حاجة أشوفها أو تيجي على بالي عقلي يقولي دي ربنا حتى الصليب أشوفه تجيلي فكرة إنه ربنا.

وأنا صغير واحد اعتدى عليا جنسيًا في المسجد بقيت أفكر إن ربنا هو اللي ظلمني.

حالة (118) فتاة – 23 سنة

لما عرفت إني حامل في بنت بقيت خايفة إني أخبطها خبطة متعمدة في غشاء البكارة وأضيعه وأتسبب لها في مشكلة لما تكبر.

لما ربنا أكرمني بولد بقيت خايفة ألمسه لمسة غير شريفة مع إن الولد صغير عنده سنتين.

إزاى أفكر التفكير الجنسي الحقير دة زى ما أكون إني عاوزة ألمسه لمسة جنسية.

لو حركت رجلي خايفة يكون معنى الحركة دي استهزاء بربنا.. أحلف إني مش هحركها ألاقيها تتحرك ييجي في بالي إني أنا قصدي كده فعلاً.. وبكده تبقى حركة رجلي لها معنى وحش.

دايمًا أسأل أنا نيتي إيه دلوقتي.. أنا سايبة نفسي لأفكار الكفر والفحش وأشعر إني راضية عنها.

لو ساكتة ولا أتكلم يخطر على بالي إني مش صابرة ولو تكلمت أبقى وحشة وأفكر إني فعلاً عاوزة كده.

أشعر إن العلاقة بيني وبين ربنا ضاعت بالنية الوحشة والكلام الوحش والأفكار الوحشة (اللي لسة محصلتش).

لا أستطيع النوم بالليل لأني لو نمت وارتاحت قدمي أكون موجهة رجلي لله.. وعندي فكرة إني لما أكون راكعة تصبح أردافي موجهة لله.. دايمًا أشعر إن كل كلامي غيبة ونميمة على الناس ودايمًا استغفر ربنا لعله يغفر لي (الذنوب اللي لسة معملتهاش).

حالة (119) فتاة – 24 سنة

دايمًا عندي فكرة إني ناقصني سجدة أو ركعة، دايمًا خايفة الشطافة تطرطش عليا ومش عارفة الماء نجس ولا طاهر.. نظيف ولا اختلط بالبول..

لو لمست يدي رجلي أبقى خايفة تكون لمست رجلي حاجة نجسة من الأرض يبقى لازم أغسل إيدي وأروح أتوضأ.

في أيام الحيض أبقى خايفة تكون الهدوم فيها نقطة دم نجس يبقى لازم أغير هدومي مرات كثيرة واحتمال يدي لمست هدومي في المكان المحتمل يكون فيه نقط دم نجس يبقى لازم أغسل يدي مرات كثيرة وأحيانًا أفضل أعد كام مرة غسلت يدي عشان أتأكد إني طهرت مكان النجاسة.

أخاف طرطشة الماء بعد التبرز تكون لمست الفرج من الخارج أو الفخذ أو قدمي.

يبقى لازم أغسلهم كلهم مع الاستنجاء وعلشان أتأكد أغسلهم مرات ومرات ومرات.. دايمًا أشك إن رجلي لمست كعب الشبشب وخايفة يكون الشبشب لمس نجاسة من الأرض يبقى لازم أغسل رجلي والشبشب والأرض مرات كثيرة.

حالة (120) شاب – 27 سنة

أنا مهتم جدًا بالدقة في كل شئ ومراجعة كل شئ وبالتالي أكرر كل شئ للتأكد.

لازم أتأكد من تكبيرة الإحرام في الصلاة وأكررها كتير.

عند كلمة "و لا الضالين" اضغط عليها جدًا وأحيانًا أكررها وأكرر الفاتحة كلها والتشهد.

دايمًا حاسس إني بضحك في الصلاة وطبعًا ده استهزاء بالصلاة.. أسلم وأعيد الصلاة مرة أخرى، لو صليت في المسجد وفاتتني ركعة مقدرش أكمل أطلع من الصلاة وأروح أصلي في البيت.

لازم أدخل الحمام قبل كل صلاة لأني أشعر إن بطني فيها فضلات تسبب الريح.

وعلى فكرة أنا حاسس ومتأكد إن الريح اللي بيطلع منى أثناء الطهارة والصلاة بيطلع بمزاجي وطبعًا بعد ذلك الاستنجاء لازم يكون تحت الدش عشان أبقى متأكد.. وعلى فكرة أنا متأكد إن نقط البول بتنزل مني أثناء الطهارة والصلاة.

أنا وصلت لنتيجة إني لازم أغتسل بعد التبرز وبعد الصحيان كل يوم الصبح خوفًا من أن أكون قد احتلمت (وهو ما لم يحدث ابدًا)، دايمًا أتخيل النساء أثناء الوضوء أتوقف وأعيد الوضوء مرة أخرى.. على فكرة أنا مش عارف أتوضأ فعلاً.. ريح يطلع، نقطة بول، حاجة بعد البول لونها أصفر أو أبيض.

أى سيكشن في الكلية أحضره لازم أروح أغتسل لأني فكرت في البنات بطريقة مش كويسة وأشعر إني بفكر فعلاً بهذه الطريقة الوحشة في البنات مع إني والله بغض بصري.

في الصلاة في تكبيرة الإحرام أفضل رافع يدي مدة طويلة لدرجة إن الإمام يكون خلص الفاتحة وركع وقام من الركوع وأنا لسة ما كبرتش.

في الوضوء نيتي تذهب أعيد الوضوء من الأول 5 أو 6 مرات.

حالة (121) رجل – 40 سنة

خايف أكون دفنت أبويا قبل ما يموت، خايف من الطلاق.. خايف أتسبب في طلاق زوجتي بدون سبب، خايف من سماع الكلمة أو قراءتها أو نطقها.

أترك أحيانًا سور كاملة في القرآن وأمتنع عن القراءة خايف ألاقي الكلمة أو معناها مكتوب في سورة أو في آية.

حالة (122) – شاب - 25 سنة

كل حاجة أنظر إليها أتصور إني أنظر على النور مش على الحاجة نفسها وعشان اخرج من الموضوع لازم أنشغل بتفاصيل الحاجة دي علشان أتأكد إني نظرت إليها مش قادر أنظر على أى حاجة وأتجنبها، لازم أنشغل بالتفاصيل جدًا علشان أتأكد إني نظرت لها.

أحيانًا أنشغل بحركة هذا الشئ الذي أهتم بتفاصيله ولا أهتم بالشئ نفسه. ساعات تجيلي فكرة إني أهتم بالأصوات المتداخلة بقيت أركز على الأشكال ومش قادر أركز على الأصوات.. عندما أمشي في الطريق أسأل نفسي هل أنا مهتم بالأرض أم مهتم بنور الشمس الذي سطع عليها ولا ارتاح إلا بعد أن أردد أنا مهتم بالأرض وطبعًا أنا مش متأكد بردي على نفسي فأكرر التفكير والرد.

أنا بشتغل مدرس أثناء الحصة أسأل نفسي أنا مشغول بالطلاب أم أنا مشغول بالجدران أم أنا مشغول بالتواجد بالغرفة أم مشغول بشرح المادة العلمية.

تجيلي فكرة إن فكري مشغول بإقناع الطلبة وأحيانًا إني مشغول بسماع الكلام ثم أسأل نفسي أنا مقتنع بالكلام دة أم أرفضه أم أوافقه.

حالة (123) فتاة – 16 سنة

حالتي النفسية زى الزفت أترعب من الرجال، خايفة أعمل معاهم حاجة.

أشعر إني لو رأيت رجل حتمايل عليه وأعمل معاه حاجة وحشة.

خايفة أعمل نفس العمل أمام الحريم وخايفة أمارس معاهم الشذوذ، خايفة أغري أبويا وأخويا إغراء يجعلهم يعملوا معايا الفاحشة.

دايمًا عندي احساس إني لا أصلي لله أشعر إني اسجد للبشر، أخاف من قراءة القرآن أمام الناس لأني أظن إني أتعمد الرياء، عندما أتناول طعامي عندي فكرة إن ربنا مش هو اللي بيرزقني.

حالة (124) شاب – 18 سنة

شكوى أمه منه:

يفتح دولاب أخيه وأخته علشان يرتبهم طبعًا أخواته رفضوا وهو مصمم .. يحصل عراك ومشاكل وضرب..

ضرب أمه وأخته علشان يرغمهم يتركوه يرتب دواليب البيت، لو فتح دولاب يرتبه ولقى حاجة مش عاجباه نظافتها مثلاً مع أنها نظيفة يرميها في الغسالة يجي أخوه يتعارك معاه.

ترك كليته ودراسته ومذاكرته علشان يرتب أى حاجة في البيت، الكنبة كل شوية يشيل الفرش اللي عليها ويرتبها مرة أخرى ويساويها ويشيلها، بعد شوية يرتبها مرة أخرى يسيب المذاكرة ويقوم يرتب مرة أخرى وأخرى.

قبل ما يروح الكلية لازم يرتب الفراش في البيت ويساويه.. وطبعًا يكون وقت الكلية راح، الأم والأخ والأخت اتخنقوا منه.

يُقبل أيدي أخته وأخيه علشان يخلوه يرتب دواليبهم وباقي أشياءهم.

يغسل شعره كل 5 دقائق علشان لازم شعره يبقى مبلول.

حالة (125) فتاة – 25 سنة

يقول زوجها عاوزة تقيم الليل صلاة متواصلة وتقول لأن عملي مش مقبول وربنا مش هيقبلني.

حالة (126) فتاة – 17 سنة

تكرار الوضوء، تكرار غسيل اليد، لو فكرت في إنسان أقل مني لازم أغسل يدي خايفة أكون زيه. أنفخ في يدي لو افتكرت حد مستواه أقل مني أو لمسته علشان لا أتأثر بخيبته.

حالة (127) شاب – 22 سنة

دايمًا حاسس إني بضحك في الصلاة مش عارف أمسك نفسي (مع أنه لا بيضحك ولا حاجة).

زوجات النبى (صلى الله عليه وسلم) أى حديث عنهم أفكر بشهوة فيهم والعياذ بالله.

دائم تغيير الملابس على الأقل 3 مرات في اليوم خايف من انتقال النجاسات من مكان لمكان.. الشك في نجاسة الحنفية أو الصابونة، في قاعدة التواليت، في ترباس الباب لازم أغسلهم كلهم.

الإسراف في الماء أثناء الاستنجاء، إعادة النية والتكبير وتكرار الفاتحة في الصلاة.

إعادة الاستنشاق والمضمضة، أخاف أسلم على حد خايف يكون في يده نجاسة.

حالة (128) شاب – 27 سنة

التدقيق الزائد، مش واثق في عيني، التأكد من رباط الجزمة طول ما أنا ماشي في الشارع لازم أنظر للجزمة للتأكد إن رباط الجزمة مازال مربوط وإن الدهان مازال نظيف.

النظام.. النظام، جوة النظام خارج النظام يا كله يا بلاش.. المثالية

تكرار تنفيض الهدوم ولازم أشيل أى فتلة أو أى حاجة أخرى بدقة.

لازم أنظر للناس واحد واحد وأقوم بعد كل الناس.

أخاف أترك أى ورقة مهمة في الشغل بعد الخروج من العمل أرجع تاني أتأكد من وجود كل ورقة في مكانها.. لو فكيت أى مبلغ لازم أحسب المبلغ تمامًا وكل قرش راح فين وأكرر الحساب لو مرة لم أجد في الحساب ولو حتى نصف جنيه أعيد مرات عديدة ولا أرتاح إلا لما أعرف راح فين.

 

 

حالة (129) رجل – 43 سنة

تكرار تنظيف وكنس الشقة وتلميع زجاج البيت كله وتكرار العملية من الظهر وحتى المغرب يوميًا وبعد نوم العيال بالليل مش عاوز العيال تقعد في البيت ولا أمهم علشان أتفرغ لنظافة البيت وعلشان محدش منهم يلخبط النظافة والنظام.

حالة (130) سيدة – 44 سنة

غسيل اليد المتكرر، غسيل الأطباق والملاعق المتكرر، تقوم بثني الملاعق حتى تتأكد أنها غسلتها، تضع الصابونة بطريقة معينة للتأكد من أنها استعملتها وأن الغسيل تم.

أى طبق تم تقريبه من سلة المهملات لازم ترميه ولا تستعمله، مجرد مرور الطبق مسافة قريبة من سلة المهملات.

تعمل علامات في المطبخ لكى تعرف إن كان أحد دخل فتدخل بعده لتنظيفه وترتيبه، تضع الشباشب مقلوبة وإذا وجدتها معدولة تعرف أن أحد أفراد الأسرة استعملها ودخل المطبخ أو الحمام فتقوم بإعادة النظافة والترتيب.

تستحلف زوجها إن كان لمس أى حاجة لتغسلها أو دخل أى مكان لتنظفه وترتبه.

حالة (131) فتاة – 25 سنة

عاوزة تقيم الليل بصورة متواصلة وكل ليلة وتقول عملي مش مقبول وربنا مش هيقبلني.. تقول أنا كفرت وربنا مش هيغفرلي مع إن مفيش أى مبرر لهذه الإتهامات، دايمًا تقول أنا جُنب بدون أى سبب وطبعًا جنب يعني إغتسال وتكرار إغتسال.

 

 

 

حالة (132) فتاة – 23 سنة

أى حاجة مش كويسة أتخيل إنها ربنا، عندي شعور دائم إني هموت دلوقتي أشعر إن ربنا غضبان عليا، أشك في الدين نفسه إيه الحكمة من كده.

خايفة يجيلي مرض نفسي.

لما أحفظ كلمات القرآن عندي احساس إنها كلمات فقط ملهاش معنى حاسة إن بيني وبين ربنا حاجز.

حالة (133) شاب – 24 سنة

دايمًا عقلي مشغول بفكرة الموت وإني هموت الآن.

أى أية قرآنية على الله وكأني أسب الله، أى ذكر للنبى محمد (صلى الله عليه وسلم) أو النبى إبراهيم أو سيدنا موسى والسلام (عليهم جميعًا أذكى الصلوات وأتم التسليم) أشعر كأني أسبهم أتصور مناظر قذرة وقبيحة جنسية على الله والأنبياء.

حالة (134) – فتاة 28 سنة

في الصلاة أشك ماركعتش، ما سجدتش، أعيد الصلاة وأعيد الوضوء.. أنا شغالة في صيدلية لو مرة أعطيت مريض دواء بديل أخاف وأشك، لو أعطيت مريض دواء أغلى شوية ضميري يوجعني وأندم، عندي فكرة إني لو ملبستش النقاب أبقى كافرة.

حالة (135) – شاب 18 سنة

وسواس محرمني أدخل البيت إلا لما يكون أبويا وأخوتي في البيت، خايف اعمل حاجة غلط مع أمي أو أختي أو خالتي، خايف أكون عملت حاجة وحشة مع مدرستي في الثانوي وتكون حامل عاوز أتأكد مع إن كل الكلام دة محصلش ومش ممكن يحصل لكن عاوز أتأكد أفكر في الموضوع ده طول النهار.

حالة (136) – شاب 30 سنة

لو قمت من النوم لازم أقوم بإقتناع ولازم أقول لنفسي أنت قمت من النوم، لو قمت بدون إقتناع أحس إني ماقمتش، لو شربت ميه حاسس إني هموت بطلت شرب ماء وبشرب عصير.

لو أكلت لازم أقنع نفسي إني شبعت مع إني لسة جعان أحس لو أكلت لقمة تانية هموت.

حالة (137) شاب – 26 سنة

أكرر الكلام اللي بقرأه، دايمًا أعيد العناوين الفرعية والجمل، دايمًا أفكر في الذات الإلهية، أفكر بعد الموت فيه إيه، أحاول أفصل دايمًا بين الشئ واسمه أنا رحت لدكتور قبل كده قاللي وسواس بس مش مصدق.

حالة (138) فتاة – 33 سنة

خايفة أكون أخذت ولد مسلم دخلته الكنيسة وهيخلوه مسيحي، خايفة يكونوا أخذوا بنتي بعد الولادة وبدلوها في المستشفى أو في الحضانة أى عيل يعدي جنبي خايفة أخده أوديه للمسيحيين.

حالة (139) سيدة – 40 سنة

كل ما أكلم عيالي أى كلام خايفة إن جارتي تسمعه وتزعل ولو حد من جيراني زارنا وراح أسأل بنتي هو أنا قلت حاجة تزعل، لا أستريح إلا لما أذهب لها وأتأكد زعلانة أم لا.

خايفة أتكلم أى كلمة أقول حاجة غلط من كتر التفكير جالي صداع ودوخة وترجيع أنا مش عايزة حد من عيالي يتكلم كلمة خايفة حد يسمع يزعل مع إن الكلام ما يزعلش، دايمًا أسأل زوجي هو أنا قلت حاجة تزعل خايفة أروح عند حد من الجيران أقول حاجة غلط علشان كدة حبست نفسي في البيت.

حالة (140) شاب – 22 سنة

تعلية الصوت في الذكر، تكرار الوضوء، تطويل الصلاة، مش عارف أبدأ في الوضوء، مش عارف أبدأ في الصلاة، تكرار التسمية قبل الأكل، تكرار الحمد لله بعد الأكل، خايف أشتم الناس، خايف أطلع كلمة من فمي.

حالة (141) فتاة – 30 سنة

أحط أذني عند فتحة الشرج لسماع أى ريح أو حركة تنقض الوضوء، في الصلاة إعادة التكبير والفاتحة مرتين، الطلوع من الصلاة والدخول فيها، كل صلاة لازم سجدة سهو.

أسأل دايمًا أتشطفت ولا ما أتشطفتش لازم أخلع هدومي كلها لما أدخل الحمام أو أثناء الوضوء.

حالة (142) شاب – 18 سنة

حاجة تقوللي هو العقل بيفكر إزاى، تفكير كثير مش قادر أوقفه، ساعات أفكر إن فلان ده هو ربنا طب إزاى.

يجيلي وسواس إن العلاج هو سبب الوسواس أسيبه.

حالة (143) شاب – 23 سنة

مش حاسس بنفسي، مش متخيل إني قاعد معاك، استغراب لأمي وأختي، حاسس إن عندي سلس بول لو نزل مني حاجة أو شكيت لازم أغتسل، أفكر في كل حاجة.. الحزن أفكر فيه، الضحك أفكر فيه، أهمية الدقة والنظام في اللبس والجسم وكل حاجة عدم التمييز بين الحقيقة والخيال في غسيل اليد أو أى حاجة.

استغراب نفسي، استغراب المكان، حاسس إني غريب، حاسس إني شايفني كأن عيني إتشالت وشيفاني، دايمًا أفكر شكلي عامل إيه وأنا ماشي، طريقتي عاملة إزاى، الناس هتقول عليا إيه، مع إني قاعد حاسس إني مش قاعد شايف نفسي مش موجود بس أنا موجود.

حالة (144) شاب – 34 سنة

في الوضوء مدة طويلة في غسيل أى عضو من أعضاء الوضوء، مش عارف أتوضأ إزاى.. أصلي ثلاث أو أربع مرات علشان أتأكد.. دايمًا حاسس إني أنطق كلام الصلاة والقرآن غلط في التشكيل، في النطق، في التجويد، مش عارف أقرأ الفاتحة.

عند التسليم آخر الصلاة أظل أكرر السلام عليكم وبركاته..ته..ته للتأكد من التسليم حتى يظن الناس إنني أغني.

في الصيام أشك هل أنا صائم أم لا.. هل انتقض الصيام، المضمضة في الوضوء 10 آلاف مرة.

خايف ينزل مني نقطة بول بعد الخروج من الحمام، انتظر ساعات في الحمام علشان نقطة البول تنزل.

حالة (145) شاب- 21 سنة

لما أحط رجل على رجل أحطها إزاى أمام ربنا لازم أنزلها تاني، لما أجلس أمام التليفزيون وأضع رجلي على ترابيزة والقرآن يشتغل لازم أنزل رجلي، مقدرش استحمل منظر الأحذية والشباشب مقلوبة لأنها تكون في اتجاه السماء لازم أعدلهم.

استمر في جمع أى لقم خبز أو أى أكل أو أى نعمة من الأرض خايف أدوس عليها وأدوس على نعمة ربنا حتى الردة الفتافيت الصغيرة.

 

حالة (146) فتاة – 26 سنة

لو مر بجانبي إنسان غير مسلم أو جلست في مكان جلس فيه قبلي إنسان غير مسلم لازم أغتسل وأغسل هدومي وأغسل المكان اللي جلس عليه.

حالة (148) سيدة – 31 سنة

خايفة يكون زوجي رمى عليا يمين الطلاق في التليفون..

سألت أخواتي، سألت الشيخ.. بس قلقانة.

خايفة أعمل الفاحشة مع ابني وهو عنده 3 سنين امتنعت عن النوم بجانبه ولو نمت اضع بيني وبينه مخدة.

لو البواب لمس أطراف أصابعي عندما يحضر لي أى حاجة تخص البيت أشعر أني أريد ذلك متعمدة.. مرة زوجي حلف على وقال لو كنت صايعة تبقي محرمة على خايفة يقع يمين الطلاق أصبحت اكتب كل حاجة تحصل واستفسر منه عندما يرجع إلى البيت هل دى صياعة ولا لأ.

هل كذا صياعة، هل قول كذا صياعة.. خايفة أنظر من الشباك، خايفة أدخل الحمام، لازم أتأكد من أن الشبابيك كلها مغلقة بسبب خوفي من أى فعل أكون بسببه صايعة ويقع يمين الطلاق.

حالة (149) شاب – 29 سنة

من مدة أخذت مبلغ من صديق وعاملته بالربا، الآن خايف إن كل فلوسي حرام، لو أنفقت أى صدقة أقول حرام لن تكتب لي عند الله صدقة لأنها فلوس حرام، أى كلام عن الربا يسبب لي الوسوسة والخوف.

دايمًا أتخيل في نفسي مشاهد جنسية وأنا فيها.

حالة (150) شاب – 19 سنة

عندي شبهات وأسئلة في فكرة خلق الأرض والأنبياء..

سؤال وجواب، سؤال وجواب.

خايف حد يزقني أمام القطار، دار الإفتاء، تلميع الحذاء، ترتيب كل حاجة.

حالة (151) فتاة – 23 سنة

فكرة في دماغي بتقولي إن أنا كافرة، إن أنا كذابة، خايفة ربنا ميقبلش مني أعمالي.. خايفة تكون أعمالي رياء وليست لوجه الله، خايفة أكون مشركة بالله، خايفة أموت كافرة مع إني بصلي وأعبد ربنا.

رحت للشيخ قالي عندك سحر ولو رددت القرآن على الماء يعكس معاك وأرجع تاني للوسواس ودي وسوسة يبطلها "قل أعوذ برب الناس" بعد الفجر والعصر 7 مرات وطبعًا عملت كل ده ومفيش فايدة.

حاسة إني مش حدخل الجنة خالص، الشيخ محمد حسان قال ده صريح الإيمان ارتحت حسيت إن عندي كبر.

أنا بعمل العادة السرية وأشعر إن ربنا عاوزني أعمل كده وأنا مش راضية عن الفكرة دي.

مرة كنت بدلع بنت أخويا وهى على ظهري شكيت إني كده بسجدلها وطبعًا دة كفر.

بخاف من حضرتك يا دكتور.

 

 

حالة (152) فتاة – 22 سنة

علشان أصلي الظهر ممكن أفضل أصلي فيه وأخرج وأدخل في الصلاة وأعيد وأحاول أصلي صلاة صحيحة يستغرق هذا وقت حتى دخول وقت صلاة العصر عليا.

درست فقه إسلامي.. كنت بتفرج على فيلم واحد بيقتل أخواته أنا دلوقتي أى إنسان قوي أعرفه أو أشوفه خايفة أعبده، خايفة أقول له يا رب.

لما أذكر اسم الله العظيم أشك أني أقول ذلك للشيطان.

لما تجيلي الوساوس أتفل على يساري 3 مرات فقط بأحس إني أتفل على المصحف.

حالة (153) شاب – 31 سنة

أنا خايف ضربات قلبي مش طبيعية، عملت رسم قلب وتحاليل طلع كل شئ سليم، برضه خايف بتجيلي نغزة في القلب ودقات قلبي سريعة.

خايف من أثر الضغط على القلب بقيس الضغط كل شوية لدرجة بتجيني فكرة بتقولي أنت بقيت مجنون.

جالي وسواس إزاى يجيلك وسواس..

لو كان ربنا موجود كان نفعك يبقى معنى كده مفيش ربنا.

حالة (154) شاب – 29 سنة

أهتم بترتيب كل شئ في مكانه، لازم أنسق الثلاجة وأرتب الأكل فيها..

بأخاف آكل علشان أى أكل لازم أرجعه، نوعيات معينة من الأكل ممنوع أكلها.

بآكل شوربة خضار فقط من 8 شهور مش علشان هى سهلة وخفيفة ولكن علشان أرجعها بسهولة.

لو الدكتور جارنا قافل يوم الجمعة أخاف آكل لغاية ما يفتح، لو جت لقمة وقفت في زوري خايف أموت أعمل إيه؟

لو أخويا مش موجود مقدرش آكل.

لازم أمشي معايا سندوتشات جبنة آكل منها قضمة كل مدة بشرط يكون حد شاغلني لو مشغول أنسى الموضوع ده.

حالة (155) شاب – 31 سنة

شاكك إني أجامع زوجتي في دبرها، بعد الجماع أبقى متنكد وأصلي ركعتين توبة مع إني لم أجامعها في دبرها، أحلف على كده.

مع إن زوجتي حامل وأكيد حامل من الجماع في القبل ولكني  أتمنى لو لم أتزوج.

حالة (156) سيدة – 27 سنة

بعد الولادة بـ 17 يوم حاجة تقولي في دماغي بدلوا ابنك.. وقلبي مش مطاوعني إني أقول كده.

أخذت الولد عملت تحاليل عشان أتأكد إنه ابني فعلا.. والتحاليل أكدت أنه ابني.

بقيت أبكي وخايفة برضه يكونوا أخدوا ابني وبدلوه..

بعد سنتين أنجبت بنت في المستشفى صممت تتولد في الغرفة ولا أتركها أبدًا ورفضت أدخل العمليات حتى لا يبدلوها.. ورجع تاني الشك إن الولد بدلوه وتاني الفكرة تقولي أنت متأكدة إنه ابنك.. دلوقتي الولد عنده 8 سنوات ومازال عندي شك.

مش عاوزة أحمل تاني لأني أخاف أولد قيصري ويبدلوا العيل.

بقول لنفسي الولد مش ابني أنظر لنفسي وأقول أستغفر الله العظيم، أنظر لنني الولد وأقارن بينه وبين نني أخته، عينه وعينها، شعره وشعرها.

حالة (157) شاب – 25 سنة

بسأل أسئلة تافهة.. يعني مثلاً فكرة تجيلي أسأل نفسي إيه اللون دة، يعني إيه لون، هل ربنا مهتم بالنملة، هل واخد باله من كل النمل ده.

واحد صاحبي سنه صغير مات أصبحت أخاف من الموت وأخاف من المستشفيات وأخاف أنام بالليل.

حالة (158) شاب – 15 سنة

من حوالي سنة أعد كل حاجة.. أعمدة النور، الكراسي، الناس، السلالم، البلاط، جوانب الغرف، سيارات، لو غلطت في العد أتضايق وأعيد العد من جديد.

في العد لازم أجعل الرقم زوجي علشان أرتاح، العد ده طول النهار والليل صعب أبطل.

حالة (159) شاب – 38 سنة

بتخيل الأعضاء

بيجيلي احساس إني عاوز أضرب بالقلم.

لفظ الجلالة آخر حاجة يقع عليها بصري يبقى هو.. حتى لو حاجات وحشة قوي.

حالة (160) شاب – 38 سنة

خايف دايمًا أنظر إلى ذكر أى رجل أمامي..

في المواصلات أبقى مضطرب خايف أبص على عورة أى حد يفهمني غلط..

خايف دايمًا أنظر لعورات الناس، خايف يقولوا عليا شاذ مع إني سليم قلبًا وقالبًا.

خايف حد يقف ورايا في أى طابور أو في الأسانسير مع إن عارف إن نيتهم مش وحشة..

في الصلاة خايف وقلقان أبص على عورة أى حد فتفسد الصلاة.

حالة (161) سيدة – 45 سنة

أنا مخبية كل السكاكين والشواكيش والمقصات وأى آلة حادة خايفة إن بنتي تطلع حامل وأبوها يقتلها لو عرف إنها حامل..

مع إنها مؤدبة جدًا ولا يمكن تعمل حاجة غلط زى دي.

دايمًا أسأل أبوها إنت لو عرفت إن البنت حامل هتعمل فيها إيه؟

عملت تحاليل حمل كذا مرة وكل مرة يطلع سلبي مفيش حمل، لكن بفكر في الحكاية دي على طول، دايمًا أبص على بطنها قوي علشان أشوف يمكن حامل، لما حاولت أكرر تحليل الحمل للبنت أبوها وهى رفضوا تمامًا.

حالة (162) شاب – 26 سنة

 لا أدوس على الماء في الشارع وأتتبع أثر الماء جاى منين ورايح فين.

أقول الكلام طول النهار.. أنساه أخاف أكون طلقت زوجتي.. في الغسل أغسل أصابعي اصبع اصبع.

 

حالة (163) فتاة (35 سنة)

غسيل اليد المتكرر..

أكره الخيط الموجود في هدوم أمي وأخوتي اللي جايبه خطيبي السابق اللي بكرهه وأشك فيه..

غسيل الصحون المتكرر أى حد يلمسني من أهلي لازم أغسل يدي واستحمى.

لو عيالي راحوا لأهلي لازم أحميهم.. لو لمسوا حاجة في دولابي لازم أغسلها وأغسل يدي.

قلت لأمي متجيش بيتي خايفة تلمس حاجة عندي.

سيبت زوجي الأول مش عاوزة أى حد لمس خيط.. واحدة تخيط.. نازل منها فتلة..

بعد كدة مش عاوزة ألمس أى إنسان، مش عاوزة حد يدخل بيتي، خايفةمن النظافة بطلت استحمى، لا أنظف البيت، تركت الصلاة.

حالة (164) فتاة – 22 سنة

وسواس الغيظ

وسواس عبارة عن ظني إن كل الناس عايزة تغيظني،لازم أسألهم أنتم عاوزين تغيظوني ولا لأ، أرتاح لما يقولوا لأ وأسأل تاني وثالث.

لو بابا معدي من الطرقة في إتجاه وأنا في إتجاه وبابا أخذ أكثر من نصف المسافة اسأل نفسي هو قاصد كده عاوز يغيظني؟

حالة (165) فتاة – 27 سنة

تعبانة من 1997، تكرار الكلام في المصحف، ظن الكفر.. زهقانة وتعيسة.

خوف من السجود للنار والشمس والنجوم.. تركت الصلاة علشان كده، لا أطبخ في البيت أبدًا أو أولع البوتاجاز خوفًا من السجود للنار وأجيب أكل من بره.

لا أنظر للشمس مطلقًا لأني لو رمشت أظن إني سجدت لها، النجوم لا أنظر لها ابدًا ولو نظرت يبقى بالخوف.

زهق.. أى حركة قدام النار أو أرفع يدي أو في الشمس أو النجوم أو حتى لمبةالثلاجة كأني سجدت وعبدتها.

واحدة جارتنا ماتت محروقة خايفة أعمل زيها وأموت محروقة منتحرة أو حد من عيالي.

لما أعدي على مكان فيه مصحف نفسي تقولي أنت عديتي عليه.

حالة (166)  فتاة – 23 سنة

يجيلي دايمًا خاطر بالتهكم على نعم ربنا لما أفكر فيها أو أقرأ عنها..

أقول طب ربنا خلقنا ما هو لازم يخلق لنا رزق وأكل وشرب ما هو ده الطبيعي.

 

3     2     1