الإسم : إ.

العمر : 30

الدولة : مصر

الموضوع :

يا دكتور انا بتعالج عند حضرتك من حوالي 8 سنين انا وصلت لمرحلة متأخرة جدا واتعالجت بالكهرباء وقبلها اقدمت على الانتحار .... كل ده بسبب افكار بتجيلي وبصدقها عن زوجي وعيلتي ..... المشكلة اني دلوقتي انا عندي طفلة عمرها سنة و الوساوس بدأت ترجعلي تاني على حد معرفتي بمرضي أنا كويسة مع بنتي لحد دلوقتي مش هاقول بنسبة 100% ولكن 70 % انا كنت جايالك ولكن انا عاوزة اكلمك بعيد عن زوجي لان مش عارفة اثق فيه تاني ... بس العيب مش فيه ...العيب فيه انا....انا دلوقتي مصدقة كل الافكار الي بتجيلي عنه ...حاسة ان فيه علاقة ما بينه وبين ستات كتير نعرفهم سوا ..... وخايفة اتكلم عن احاسيسي بصراحة خوفا من ان بنتي تتأذى ...بيجيلي هاجس ان في ناس بتعمللي عمل ... و بفكر اطلب الطلاق ...واعيش انا و بنتي لوحدنا ....علشان لو هوا عايز يعيش حياة العزوبية مرة تانية يعيشها بس بعيد عني .... نومي كويس الحمد لله... الافكار كانت موجودة من زمان بس حوالية ....دلوقتي هية جوا دماغي و مصدقاها و متخللاني ....مش مهم عندي خلاص حياتي الجنسية..... لو كنت هابقى في لوووب ...انا هاقطع اللوب ده بإني اختار البرود الجنسي و الانورجازما عن اني ابقى في هواجس أو امشي و الناس تستعيذ من الشيطان اول ما تشوف وشي انا حتى حاسة ان في حاجة في وشي بتخوف الناس بس مش عارفة ايه هيه...! انا تعبانة وبختار ارجع للادوية اللي بتهد الحيل وتبوظ الجسم وتسبب برود لو هوا ده الحل الوحيد ان اربي بنتي صح بس انا مش عايزة زوجي تاني خلاص عارف رفضي له عامل زي ايه زي بنتين واحدة حلوة اوي وواحدة وحشة اوي .....و الوحشة عارفة ان الحلوة طيبة بس هية مضايقة من لمة الولاد حواليها ..... فهتقطع العلاقة علشان تخلص نفسها من حسدها ليها... كان نفسي اعيش صح يا دكتور حتى مع المرض ..... بس مش عارفة.... انا بعيد اوي عن ربنا دلوقتي عاوزة ارجع لدوا ينهي الافكار دي تاني لو كان ممكن ....و عايزة ابعد عن زوجي .....حاسة انه ندمان انه اتجوزني و حاسة انه بيقولي بحبك و هوا مستحمرني.

 يا ريت ترد عليا بسرعة يا دكتور و لو حتى بكلمة تعاليلي العيادة ....بس انا كدة ارتحت لما كلمتك لاني مكنتش هافتتكر اقول كل ده وانا عندك ...!

الـــــــــــــــــــــــرد

أختي الفاضلة

أرجو أن تكوني مستمرة على العلاج الذي حددناه لك من قبل، ولكني أشعر مع الأسف أنك قطعت العلاج.. تحتاجين إلى متابعة طبيب نفسي متخصص حيث أن الأفكار التي تعانين منها قد تدمر حياتك لذا أنت تحتاجين علاج دوائي حتى يمكنك التكيف مع هذه الأفكار وهزيمتها بدلاً من أن تهزمك هى.. المشكلة فيكي .. زوجك زى الفل وأنا عارفه كويس، وما دمت قد اخترت طريق العلاج ولا يهمك الإشباع الجنسي كما تقولين فيجب عليك الاستمرار على الدواء، ويمكنك المرور علي في العيادة في أقرب وقت أما إذا لم تستطيعي فيمكنك البدء في أخذ ريسبردال 2 ملجم نصف قرص لمدة 6 أيام ثم قرص يوميًا ونحن في انتظارك.. اصبري واصبري واصبري ولا تصدقي هذه الأفكار واستمري على العلاج.. وإذا كنت فعلاً تريدين مني كلمة تريحك فأنا بقول أستمري على العلاج ويا ريت تسمعي الكلام والله المستعان.. توكلي عليه.