أنا متجوزة من 8 سنين وعندى ولدين. السنتين الأخيرة من جوازنا مرينا أنا وجوزى بضغوط مادية وعدم استقرار مادى ، وهو دلوقتى بيشتغل 14 ساعة وبيرجع البيت متأخر يادوب ياكل وينام!
المشكلة ان أنا اليومين اللى فاتو دول بقيت عصبية جدا مع ولادى وبتفاجأ بنفسى بردد كلام وحش أوى ليهم غصب عنى" ( ربنا ياخدنى، الله يلعنكو....) وبحس بعدها بالزعل وتأنيب الضمير
أنا خايفة ان أولادى يكرهونى وخايفة انى أتقلب وأبقى صورة طبق الأصل من أهلى فى التربية واللى كنت دايما بعترض على أسلوبهم
أرجوكم ساعدونى وقولو ليا على طرق أهدى بيها ولو فى أدوية مهدئة مأمونة ياريت تقولو ليا عليها وأنا أشتريها
طلب أخير : أنا مش عارفة أتعامل مع عيب صعب فى ابنى الكبير (7 سنين)، وهو انه دائم الشكوى من أى حاجة ومن أقل حاجة ، وزنان جدا وكثير الكلام للغاية ، وما بيصبرش على اللى هو عايزه لحد ماييجى ، ولو مجاش يبقى عصبى جدا ويبدأ فى الخناق وتوجيه اللوم ليا أو لأبوه على أى حاجة بتحصله ، وده بيزود عصبيتى أنا كمان
باشكركو جدا ومستنية ردكو